SHIRIKA LA BIASHARA LA TAIFA ZANZIBAR (ZSTC) KUWASAIDIA WAKULIMA WA KARAFUU

Mkulima wa vitalu vya karafuu wa Kitope Mzee Sheha Khamis akimuelezea Mkurugenzi Mtendaji wa Shirika la ZSTC changamoto anazokabiliana nazo katika kutekeleza kazi hiyo wakati Mkurugenzi huyo alipofanya ziara katika Mkoa Kaskazini Unguja na Wilaya Kati.

Mfanyakazi wa kitalu cha Mikarafuu cha Donge Bi Fatma akitayarisha udongo kwa ajili ya kuatika miche katika shamba hilo linalomilikiwa na Wizara ya Kilimo na Mali Asili.

Na Ramadhani Ali/Maelezo Zanzibar

Shirika la Biashara la Taifa Zanzibar (ZSTC) kwa kushirikiana na Wizara ya Kilimo na Mali Asili linakusudia kuongeza mashirikiano na kuwasaidia wananchi wanaoanzisha vitalu vya mikarafuu Unguja na Pemba.

Mkurugenzi Mwendeshaji wa ZSTC Bibi Mwanahija Almasi ametoa ahadi hiyo baada ya ziara yake ya siku mbili kutembelea vitalu vya mikarafuu vya Serikali na vya watu binafsi katika vijiji vya Kitope, Kidimni, Machui Selem na Donge kuona matatizo yanayowakabili katika kutekeleza kazi zao.

Amesema vitalu vya watu binafsi vinamchango mkubwa katika kuimarisha zao la karafu Zanzibar kwa kuziba pengo linalojitokeza wakati wa ugawaji wa miche ya mikarafuu kwa wakulima kutoka vitalu vya Serikali

Amesisitiza kuwa kutoakana umuhimu huo na kazi kubwa wanayochukua wakulima hao huku wakikabiliwa na upungufu wa nyenzo muhimu, Shirika litatoa pembejeo zitakazosaidia kufanikisha kazi zao kwa ufanisi.

Wakati wa ziara hiyo wakulima wanaomiliki vitalu vya mikarafuu walimueleza Mkurugenzi Mwendeshaji wa ZSTC kwamba wanakabiliwa na tatizo la vifuko vya kuatikia miche (policing), mabero, pauro na maji hasa wakati wa kiangazi.