Idadi ya abiria ATCL yazidi kupaa

Na Mwandishi Wetu.

IDADI ya abiria wa Shirika la ndege la Air Tanzania (ATCL) imezidi kuongezeka kila kukicha kutokana na wananchi kuonyesha uzalendo na imani kwa kampuni hiyo , Kaimu Mkurugenzi Mtendaji wa ATCL Paul Chizi amesema.

Kwa mujibu wa taarifa iliyotolewa kwa waandishi wa habari jana Chizi alisema kutokana na imani hiyo, kampuni yake imejizatiti kuleta mabadiriko makubwa katika sekta ya usafiri wa anga kupitia mpango  wa maendeleo wa miaka mitano wa shirika hilo.

Chizi alisema tangu uzinduzi wa safari za Dar es Salaam-Kilimanjaro-Mwanza wiki moja iliyopita kwa kutumia ndege ya aina ya Boeing 737-500,kampuni yake imekuwa ikijaza abiria takribani 106 katika kila safari kwa siku tatu mfulilizo ikiwemo na siku ya jana hali ambayo inaashiria kuwa wananchi wameanza kuwa na imani na huduma zinazotolewa na shirika lake.

 “Ndege yetu kwa takribani siku tatu zilizopita imekuwa ikija katika safari zote za Dar es Salaam-Kilimanjaro-Mwanza . Sikujua kuwa tutakuwa na uwezo wa kurejea na kupata mapokezi ya namna hii kwa haraka kutokana na kuwa kuna watoa huduma wengine katika njia hii .

 “Baada ya wananchi kuonyesha imani na uzalendo,tutaendelea na kuongeza nguvu zetu katika kutoa huduma zetu kwa wakati na kwa bei nafuu. Nawaomba wananchi kuendelea na uzalendo wanaouonyesha kwa faida ya kampuni yetu na nchi nzima kwa ujumla,” alisema.

Chizi alisema kuwa mipango ya kampuni hiyo ya kupata ndege nyingine ambayo itatumika katika safari za kimataifa katika miezi mitatu mpaka sita ijayo inaenda vizuri na kuongeza kuwa kampuni itatoa taarifa kamili wakati muafaka utakapofika.

“Kutokana ukweli kuwa tunatarajia kuanza safari za kimataifa, ni dhahiri kuwa ndege ambayo  tunategemea kuleta lazima iwe kubwa,” aliongeza.

Alisema kuwa kampuni yake kwa sasa imejikita katika utekelezaji wa mpango wake wa maendeleo wa miaka mitano utakaosaidia kuongeza ubora katika kampuni hiyo na kuboresha utoaji huduma kwa ujumla.

“Tutajikita katika kuongeza ubora wa huduma tunazozitoa na vilevile kuchukua nafasi ile tuliyoipoteza hapo nyuma. Tunamatarajio ya kupata ndege nyingine ya Boeing na mazungumzo yameshaanza na tumefikia pazuri,” alisema.

Kurudi kwa huduma za ndege ya ATCL kumeanzisha  vita ya viwango vya bei za usafiri wa anga bada ya ATCL kutoza bei ya shilingi 199,00 kwa safari zake kwenda na kurudi (return ticket) na kusababisha watoa huduma wengine wakiwemo Precision Air nao kupunguza gharama zao ile ilikukabiriana na ATCL.

KWA MUJIBU WA TFF KAMATI ILIYOUNDWA YANGA NI BATILI, KLABU ITAENDELEA KUWA CHINI YA KATIBU MKUU NA SEKRETARIETI YAKE

Kamati ya Sheria, Maadili na Hadhi za Wachezaji ya Shirikisho la Mpira wa Miguu Tanzania (TFF) ilikutana Mei 26 mwaka huu ili kutoa mwongozo wa nini kifanyike ndani ya Yanga baada ya wajumbe wake kudhaa kujiuzulu. Kamati ya Uchaguzi ya Yanga ilikuwa imeomba mwongozo huo TFF.

 

Baada ya kupata taarifa rasmi kutoka Yanga, Kamati imebaini kuwa Kamati ya Utendaji ya Yanga imekosa akidi baada ya wajumbe wake wengi kujiuzulu hivyo kutokuwa na uwezo wa kufanya uamuzi kwa mujibu wa Ibara ya 32(1) ya Katiba ya klabu hiyo.

 

Hivyo, Kamati imetoa mwongozo kwa Kamati ya Uchaguzi ya TFF ambayo ndiyo msimamizi wa Kamati ya Uchaguzi ya Yanga kuwa ili Kamati ya Utendaji ya Yanga iwe na nguvu za kikatiba kufanya shughuli zake ikiwemo uamuzi wa masuala mbalimbali ndani ya klabu hiyo ni lazima iwe na akidi.

Kwa mujibu wa Ibara ya 29(3) ya Katiba ya Yanga nafasi zilizo wazi katika Kamati ya Utendaji zinatakiwa kujazwa katika Mkutano Mkuu wa Kawaida ujao.

Pia Kamati imebaini uteuzi wa kujaza nafasi zilizo wazi za wajumbe uliofanywa na Kamati ya Utendaji ya Yanga, Mei 21 mwaka huu ni batili kwa vile Kamati ya Utendaji iliyofanya uteuzi huo haikuwa na akidi.

Ili kupata akidi na kufanya uamuzi Kamati ya Utendaji ya Yanga yenye wajumbe 13 inatakiwa kuwa na asilimia 50 ya wajumbe wote, hivyo ili wafanye uamuzi halali hawatakiwi kupungua saba.

Kwa wajumbe ambao hawajajiuzulu; Sarah Ramadhan, Mohamed Bhinda, Tito Osoro na Salim Rupia kwa sasa hawawezi kufanya shughuli zozote za Yanga hadi nafasi zilizo wazi katika Kamati ya Utendaji zitakapojazwa.

Kama inavyoelekeza Katiba ya Yanga, shughuli za kila siku za klabu hiyo zitaendelea kufanywa na Sekretarieti ya Yanga ambayo kiongozi wake ni Katibu Mkuu.

 

Alex Mgongolwa

Mwenyekiti

Kamati ya Sheria, Maadili na Hadhi za Wachezaji

TAIFA STARS, MALAWI ZAINGIZA MIL 40/-

Mechi ya kirafiki ya kimataifa kati ya Tanzania (Taifa Stars) na Malawi (The Flames) iliyochezwa Mei 26 mwaka huu Uwanja wa Taifa, Dar es Salaam imeingiza sh. 40,980,000.

 

Mapato hayo yametokana na washabiki 10,767 waliokata tiketi kushuhudia pambano hilo kwa viingilio vya sh. 3,000, sh. 5,000, sh. 51,000 na sh. 20,000. Washabiki 9,365 walikata tiketi za sh. 3,000.

 

Asilimia 18 ya mapato hayo ambayo ni sh. 6,251,186 ilikwenda kwenye Kodi ya Ongezeko la Thamani (VAT) wakati gharama kabla ya mgawo zilikuwa tiketi (sh. 4,999,800), waamuzi (sh. 1,105,000), usafi na ulinzi (sh. 2,350,000), maandalizi ya uwanja- pitch preparation (sh. 400,000), Wachina- Beijing Construction (sh. 2,000,000) na umeme (sh. 300,000).

Kwa upande wa mgawo asilimia 20 ya gharama za mechi ni sh. 4,714,803, asilimia 10 ya uwanja sh. 2,357,401, asilimia 5 ya Shirikisho la Mpira wa Miguu Afrika (CAF) sh. 1,178,701, asilimia 20 ya Mfuko wa Maendeleo ya Mpira wa Miguu (FDF) sh. 4,714,803 na asilimia 45 ya TFF (sh. 10,608,306).

 

TWIGA STARS UWANJANI ETHIOPIA LEO

Twiga Stars inacheza leo (Mei 27 mwaka huu) na Ethiopia katika mechi ya kwanza ya raundi ya pili ya michuano ya Afrika kwa Wanawake (AWC) kuwania tiketi ya kucheza fainali zitakazofanyika Novemba mwaka huu nchini Equatorial Guinea.

Mechi hiyo itakayoanza saa 10 jioni kwa saa za nyumbani itafanyika kwenye Uwanja wa Taifa ulioko jijini Addis Ababa na timu hizo zitarudiana Juni 16 mwaka huu kwenye Uwanja wa Taifa, Dar es Salaam.

 

Kwa mujibu wa taarifa kutoka Addis Ababa, wachezaji wa Twiga Stars ambayo imefikia hoteli ya Churchil, leo saa 4 asubuhi wamefanya mkutano wa mwisho wa maandalizi ya mechi hiyo na kocha wao Charles Boniface Mkwasa na baadaye kupata chakula cha mchana kwa Balozi wa Tanzania nchini Ethiopia.

 

Twiga Stars; Fatuma Omari, Mwajuma Abdallah, Fatuma Bashiri, Fatuma Khatib, Evelyn Sekikubo, Mwapewa Mtumwa, Etoe Mlenzi, Mwanahamisi Omari, Ester Chabruma, Fatuma Mustafa na Asha Rashid.
Wachezaji wa akiba ni Maimuna Said, Semeni Abeid, Zena Khamis, Amina Ally, Rukia Hamis na Fadhila Hamad.

 

Mchezo huo unachezeshwa na Angelique Tuyishime akisaidiwa na Sandrine Murangwa, Speciose Nyinawabari na Salma Mukansanga wote kutoka Rwanda. Kamishna ni Catherine Adipo kutoka Uganda.

 

MASHINDANO YA JUDO YAFANYIKA JIJINI DAR ES SALAAM

Rais wa Judo Tanzania Bw, Khalifa Kiumbemoto katikati akifuatila kwa makini Mashindano ya Mchezo huo yaliyofanyika katika Ukumbi wa Landmark  jijini Dar es Salaam wa kwanza kushoto kwake ni Mkurugenzi msaidizi wa Wizara ya Habari na Michezo Bw. Charles Mattoke  na wapili kushoto kwake ni Mdhamini wa Mashindano hayo kutoka Germin Copperation LTD Bw. Yulliy Tarverdyan. Katika Mashindano hayo Watanzania walionekana kushindwa na wachezaji kutoka Zanzibar.

Mchezaji wa Judo kutoka CCP Polisi Moshi (wa juu) Bw. Kisamerwa Magangwa akiwa amemgeuza mshindani wake Bw,.Mohammed Juma kutoka Magereza  Ukonga jijini Dar es Salaam katika mchezo huo.

Baadhi ya mashabiki walioudhuria katika
mpambano wa mchezo huo wakifuatilia kwa makini.

Wataalamu wa kufuatilia muda katika mashindano ya mchezo huo wakifuatilia kwa umakini mchezo huo.

Msama Promotions yadaka mtambo wa CD feki

Na Mwandishi Wetu

MKURUGENZI wa Kampuni ya Msama Promotions, Alex Msama amesema kuwa wamefanikiwa kukamata mashine za kudurufu kazi za wasanii wa nyimbo ambazo tathmini yake katika utendaji kazi ni mkubwa ukilinganishwa na mashine nyingine alizowahi kuzikamata.

Akizungumza na waandishi wa habari, Dar es Salaam jana, Msama alisema utaratibu wa kuwasaka wezi wa kazi za wasanii wa nyimbo za injili unaendelea katika maeneo mbalimbali ya Dar es Salaam na mashine hizo zilikamatwa mwanzoni mwa wiki iliyopita.

Alisema mbali ya kukamata mashine hizo, pia walifanikiwa kumkamata mhusika anayefanya kazi hiyo, Anord Chrispian ambaye anashikiliwa na Jeshi la Polisi kwa tuhuma hizo.

Msama alisema wamefanikiwa kukamata mitambo hiyo kwa kushirikiana na Jeshi la Polisi Kanda Maalumu ya Dar es Salaam na kusisitiza kuwa msako wa kuwabaini watu wanaojihusisha na kazi hiyo ya wizi unaendelea kwa ari na kasi aliyoanza nayo.

Akizungumzia tukio hilo Ofisa Upelelezi wa Jeshi la Polisi ambaye hakutaka jina lake liandikwe gazetini kwa sababu za kiintelijensia, alisema mtambo huo wa kudurufu kazi za wasanii ulikamatwa katika nyumba ya mtu anayefahamika kwa jina maarufu 'Msukuma' katika eneo la Kimara Bonyokwa.

Alisema mtuhumiwa alikamatwa akifanya kazi hiyo mchana na baada ya upekuzi wa zaidi ya saa mbili ndani ya nyumba hiyo walikuta mikasi na sindano za kufanya kazi ya kuandaa vifungashi vya CD, VCD, DVD na kaseti zinazozalishwa ndani ya chumba hicho.

Ofisa huyo wa upelelezi alisema kitu kingine kilichokutwa ndani ya chumba hicho ni wino wa kuchanganya katika kuandaa kava za bidhaa zinazozalishwa.

Alisema mitambo iliyokamatwa ni mitatu ya kudurufu CD na DVD, mitambo sita ya kudurufu kaseti na mitambo mitatu ya kuandaa kava za CD, DVD na kaseti.

Alibainisha kuwa uchunguzi wa awali umebainisha kuwa mitambo hiyo ina uwezo wa kudurufu DVD 10,000 na VCD 30,000 kwa wiki na kwamba mmiliki wa mtambo huo ni miongoni mwa wasambazaji wakubwa wa kazi bandia za sanaa ya muziki.

Alisema kati ya maeneo ya Dar es Salaam yanayoongoza kwa kuwa na wazalishaji wa kazi bandia za wasanii Ubungo ndio eneo mama ikifuatiwa na Kimara na viunga vyake.

Kwa mujibu wa ofisa huyo, mitambo na vifaa vyote vilivyokamatwa vimehifadhiwa katika kituo cha Polisi Kimara Mbezi kwa Yusufu na mtuhumiwa anashikiliwa kwa tuhuma hizo huku uchunguzi ukiendelea dhidi ya tukio hilo.

Kipindi kilichopita Kampuni ya Msama iliwahi kumkamata kiongozi wa mtandao wa kundi la wanyonyaji wa kazi za wasanii wa muziki wa injili, Francis Kamalamu, aliyekuwa akifanya biashara hiyo katika eneo la Ubungo Maziwa, Dar es Salaam.

Maofisa usambazaji wa kampuni hiyo, wamefanikiwa kwa kiasi kikubwa kuwabaini wezi wa kazi za wasanii na mbinu mbalimbali zinazotumiwa na wasambazaji na wazalishaji wa kazi hizo zimenaswa na zinatumiwa kuwatia nguvuni na taratibu za kisheria kuchukua mkondo wake.

Meneja Twanga Pepeta afukuzwa

Na Mwandishi Wetu

MKURUGENZI wa bendi ya African Stars 'Twanga Pepeta', Asha Baraka amesema kuwa wamemfukuza kazi Meneja wa bendi hiyo, Martin Sospeter.
Akizungumza Dar es Salaam jana, Asha alisema wamefikia uamuzi huo baada ya kugundua kuwa Sospeter anaihujumu bendi kwa kuwashawishi wasanii kuihama bendi hiyo ili watue bendi ya Mashujaa ambayo naye ana mipango ya kutua huko.
"Tumeamua kumfukuza kazi Meneja wa Twanga Pepeta, Sospeter kutokana na sababu mbalimbali zikiwemo za ubadhirifu na kutowajibika ipasavyo... anasuka mipango ya kwenda bendi ya Mashujaa, hivyo tumeamua kumuondoa mapema ili aende akiwa huru.
"Tumemwandikia barua ya kumfukuza kazi na pia anapaswa kulipa fedha za matamasha alizokwapua... nimeamini kumbe kikulacho kinguoni mwako," alisema Asha.
Pia alisema sababu nyingine ya kumtimua ni kukosa uaminifu baada ya kupokea fedha za matamasha mbalimbali takriban sh. milioni 6, lakini hajaziwasilisha ofisini kama ilivyo utaratibu wa kazi.
Asha alisema uchunguzi uliofanywa kwa muda mrefu kumhusu Sospeter umebainika kuwa ndiye amekuwa mstari wa mbele kuwashawishi baadhi ya wasanii wa Twanga Pepeta waliohamia Mashujaa na yeye ana mpango wa kuhamia katika bendi hiyo, hivyo anawatanguliza wasanii ili iwe rahisi yeye kujiunga nao atakapokamilisha dhamira yake.
"Mashujaa wenyewe wanadai eti Sospeter anajua siri nyingi za mafanikio ya Twanga Pepeta, hivyo atawasaidia kuimarisha bendi yao, tumeamua kumfukuza ili akawape vyema hizo siri," alisema Asha.
Mkurugenzi huyo alisema imebidi wamfukuze akajiunge na bendi hiyo anayoona anataka kuitumikia na kwamba safari aliyokwenda  Nyanda za Juu na bendi hiyo ndiyo ya mwisho katika utumishi wake akiwa na Twanga Pepeta.
Mbali ya hujuma za fedha na wasanii walioikimbia Twanga Pepeta kuhamia Mashujaa, Asha alisema kuwa imegundulika kuwa, Sospeter hivi sasa anamshawishi mpiga gita la besi wa bendi hiyo, Jumanne Said 'Jojo Jumanne' ili ahamie Mashujaa, hali aliyosema kuwa haiwezi kuvumiliwa kuendelea kuitafuna bendi hiyo.
"Tumemchunguza na kujiridhisha kumhusu huyu meneja Sospeter, ni mtu asiyeitakia uhai Twanga Pepeta... kama hilo ndilo lengo lake akafanye kazi na hao wanaomhitaji na mimi niendelee na mipango yangu na watu ninaoamini kuwa watanisaidia kuikuza tasnia ya muziki wa Twanga Pepeta," alisema Asha

TAARIFA YA KUKAMATWA KWA MADAWA YA KULEVYA AINA YA BANGI MAGUNIA 50 NA WATUHUMIWA WANNE MKOANI ARUSHA

Mkuu wa kitengo cha kuzuia na kudhibiti madawa ya kulevya Mkoa wa Arusha Mrakibu wa Polisi Hamis Warioba akiwaonyesha waandishi wa habari shehena ya mifuko 50 ya bangi iliyokuwa kwenye gari baada ya kukamatwa tarehe 23/05/2012 wilayani Longido (PICHA NA GLADNESS MUSHI -ARUSHA)

Mkuu wa kitengo cha kuzuia na kudhibiti madawa ya kulevya Mkoa wa Arusha Mrakibu wa Polisi Hamis Warioba akihoji jambo kwa watuhumiwa hao.

MNAMO TAREHE 23/05/2012 MUDA WA SAA 9:00 ALASIRI HUKO SINYA VILIMA SABA MPAKANI MWA KENYA NA TANZANIA KATIKA WILAYA YA LONGIDO, ASKARI WA JESHI LA POLISI MKOANI HAPA KWA KUSHIRIKIANA NA ASKARI WA WANYAMA PORI WALIFANIKIWA KUKAMATA WATU WANNE WAKIWA NA MIFUKO 50 YA MADAWA YA KULEVYA AINA YA BANGI KWENYE GARI AINA YA CANTER DCM LENYE NAMBA ZA USAJILI T.922 AFJ MALI YA ZEPHANIA S/O KAMBEI MKAZI WA NGARAMTONI.

MADAWA HAYO YALIKUWA YANASAFIRISHWA KUTOKA KATIKA VIJIJI VILIVYOPO KANDO YA KANDO YA MLIMA MERU KUELEKEA NAIROBI NCHINI KENYA KUPITIA NJIA ISIYO RASMI (MAARUFU KAMA NJIA YA PANYA) ILIYOPO HUKO SINYA VILIMA SABA, NA BAADA YA KUONA HIVYO RAIA WEMA WALITOA TAARIFA KWA ASKARI HAO NA HATIMAYE KUFANIKIWA KUWAKAMATA.

WATUHUMIWA WALIOKAMATWA KATIKA TUKIO HILO NI BABUU S/O LAIZER (34) MKULIMA, MKAZI WA OLDONYOSAMBU,LOMNYAKI S/O LEKIBENGI (30) MKULIMA , MKAZI WA OLDONYOSAMBU, JOHN S/O JOSHUA AMBAYE NI UTINGO NA NI MKAZI WA OLDONYOSAMBU NA EDWARD S/O MOLLEL (27) DEREVA NA NI MKAZI  WA OLDONYOSAMBU.

BADO JESHI LA POLISI MKOANI HAPA LINAENDELEA KUWAHOJI WATUHUMIWA HAO ILI KUBAINI WAHUSIKA WENGINE NA PINDI UPELELEZI UTAKAPOKAMILIKA  WATAFIKISHWA MAHAKAMANI.

IMETOLEWA NA KAMANDA WA POLISI MKOA WA ARUSHA,

KAMISHNA MSAIDIZI MWANDAMIZI WA POLISI

(SACP) THOBIAS ANDENGENYE

TAREHE 25/05/2012.

ZANZIBAR HALI SI SHWARI

Kanisa la Tanzania Assemblies of God (TAG) liliopo mtaa wa Kariakoo mjini Unguja limechomwa moto jana usiku wa kuamkia leo na watu wasiojulikana.

(Picha/Zanzibar Yetu)

Gari la Kiongozi wa Kanisa la Tanzania Assemblies of God (TAG) Bishop Dickoson Maganga lililochomwa moto na watu wasiojulikana usiku wa jana katika eneo la Kariakoo nje ya kanisa hilo ambapo uharibifu wote unaelezwa kuwa umegharimu shilingi millioni 120.

KUFUATIA MACHAFUKO ZANZIBAR LEO

Askari wakiwa katika hali kutuliza vurugu, na hapa mkazi mmoja ambaye jina lake halikutambulika, akipewa kibano baada ya kuhusika na Ghasia hizo.

Askari wakiranda kutuliza Ghasia, ambazo watu wameandamana kupinga Muungano

Gari likiwa limeteketea kwa moto kufuatia ghasia hizo

Mmoja wa Waislam akionyesha kitu ambacho kinasadikiwa kuwa Damu wakati vurugu zikiendelea muda huu

Wakazi wa Zanzibar, wakiwa katika maandamano

Mkutano wa CHADEMA LEO

Umati wa wananchi wakiwa wamefurika Viwanja vya Jangwani.

ICD yazindua mtandao wa taarifa kuhusu walemavu

 Mkurugenzi Mtendaji wa Kituo cha Habari Kuhusu Ulemavu nchini Tanzania (ICD), Fredrick Mkatambo akizungumza na wageni waalikwa katika hafla hiyo. Kushoto ni Kamishna kutoka Wizara ya Ustawi wa Jamii, Danford Makala aliyekuwa mgeni.

 Baadhi ya wageni waalikwa na wafanyakazi wa ICD wakiwa katika hafla hiyo

Picha ya pamoja ya wafanyakazi wa ICD mara baada ya uzinduzi.

 
KITUO cha Habari Kuhusu Ulemavu (ICD) nchini Tanzania kimezindua mtandao (Blogu) ambayo itakuwa ikikusanya taarifa mbalimbali kuhusiana na masuala ya walemavu na kuziweka katika mtandao huo ili wadau anuai waweze kujua taarifa hizo.

Akizungumza jana jijini Dar es Salaam katika hafla ya uzinduzi wa mtandao huo ambao utakuwa ukisimamiwa na ICD, Mkurugenzi Mtendaji wa kituo hicho, Fredrick Mkatambo amesema kwa muda mrefu imekuwa ni vigumu kupata taarifa zote juu ya masuala ya walemavu jambo ambalo ni moja ya vikwazo.

Alisema kuanzishwa kwa mtandao huo utasaidia wadau wa masuala ya walemavu ikiwemo Serikali kuingia na kupata taarifa mbalimbali zikiwemo changamoto inayokumbana nayo jamii hiyo na ikiwezekana wahusika kuwasaidia kundi hilo.

Aidha alisema “Najua kwa sasa kazi ni ngumu kupata taarifa muhimu juu ya masuala mbalimbali ya ulemavu…lakini naamini kwa sasa itakuwa ni rahisi maana tunasehemu ambayo unaweza kupata taarifa zote muhimu juu ya walemavu,” alisema Mkurugenzi.

Akifafanua namna mtandao huo utakavyokuwa ukifanya kazi, Mshauri wa Kiufundi kutoka kituo cha ICD, Natalia Lintner alisema katika blogu hiyo walemavu wanaweza kupata taarifa mbalimbali zinazowagusa kama ufadhili wa masomo, vyuo vikuu rafiki wa walemavu, matangazo muhimu yanayowagusa walemavu na habari za kawaida kuhusu watu wenye ulemavu.

Alisema taarifa nyingine ambazo zitakuwa zikioneshwa katika mtandao huo ni mashirika na taasisi mbalimbali zinazofanya kazi na watu wenye ulemavu na shughuli zake, pamoja na wadau anuai kuwa na uwezo wa kuchangia/kusaidia walemavu kupitia mtandao huo.

Naye Kamishna kutoka Wizara ya Ustawi wa Jamii, Danford Makala akizindua mtandao huo pamoja na kitabu cha ‘Maisha Yangu’ ambacho kimeandaliwa na ICD na wafadhili wengine, alisema mtandao na kitabu hicho vitakuwa ni vyanzo vizuri vya taarifa kuhusu watu wenye ulemavu.

Alisema mtandao huo ambao ni sawa na jukaa la taarifa kuhusu watu wenye ulemavu litaisaidia Serikali pia kupata taarifa anuai juu ya masuala ya watu wenye ulemavu, ambazo zitakuwa chachu ya maboresho ya sera mbalimbali kila uchao.

“Hii ni njia ambayo watu wenye ulemavu wanaweza kupaza sauti yao kwa pamoja…kwa kutumia mtandao huu, tujitokeze kuchangia basi ili kweli mtandao huu uweze kufanya kazi ipasavya,” alisema Makala.

Kitabu cha maisha yangu ambacho kimezinduliwa pia katika hafla hiyo kimekusanya mahojiano ya watu wenye ulemavu jijini Dar es Salaam nia kuainisha changamoto mbalimbali katika maisha yao, hivyo kuleta picha halisi ya walemavu Tanzania.

*Habari hii imeandaliwa na Mtandao wa Thehabari.com (www.thehabari.com)  

VIKUNDI VYA KUWEKA NA KUKOPA VINAVYOSAIDIWA NA TAASISI YA WAMA VYAPEWA SEMINA YA UMUHIMU WA KUJIUNGA NA MFUKO WA BIMA WA AFYA (NHIF)

 Tabu Likoko Mkurugenzi wa Idara ya Uwezeshaji Wanawake katika Taasisi ya (WAMA) akifungua rasmi semina ya wanawake kutoka vikundi mbalimbali vya kuweka na kukopa vinavyosimamiwa na Taasisi ya (WAMA) kuhusu huduma za Mfuko wa Bima wa Afya NHIF inayofanyika kwenye viwanja vya Taasisi ya WAMA asubuhi hii jijini Dar es salaam kutoka kulia  pichani ni Rehani Athumani Mkurugenzi mifuko ya Afya ya Jamii (CHF), Michael Mhando Mkurugenzi wa Tathmini ya Uhai wa Mfuko na Utafiti na Eugen Mikongoti Mkurugenzi wa Uendeshaji.

Eugen Mikongoti Mkurugenzi wa Uendeshaji (NHIF) akizungumza katika semina hiyo jinsi mfuko huo unavyosaidia jamii kupata matibabu, kulia ni Rehani Athumani Mkurugenzi mifuko ya Afya ya Jamii (CHF) na katikati ni Michael Mhando Mkurugenzi wa Tathmini ya Uhai wa Mfuko na Utafiti na

 Afisa wa Masoko na Elimu kwa Umma NHIF Grace Michael akifuatilia mada katika semina hiyo, kushoto ni Philomena Marijani Afisa Uraghibishi na Mawasiliano Taasisi ya (WAMA).

Rehani Athumani Mkurugenzi mifuko ya Afya ya Jamii (CHF) akitoa mada mbalimbali juu ya huduma za mfuko wa bima ya Afya, huku washiriki wa semina hiyo wakimsikiliza kwa makini, katikati ni  Michael Mhando Mkurugenzi wa Tathmini ya Uhai wa Mfuko na Utafiti na kulia Eugen Mikongoti Mkurugenzi wa Uendeshaji.

 Washiriki wa semina hiyo wakiandika mambo muhimu yaliyojadiliwa katika semina hiyo inayofanyika katika viwanja vya Taasisi ya (WAMA).

Washiriki wa semina hiyo wakiandika mambo muhimu yaliyojadiliwa katika semina hiyo inayofanyika katika viwanja vya Taasisi ya (WAMA).

Washiriki wa semina hiyo wakiandika mambo muhimu yaliyojadiliwa katika semina hiyo inayofanyika katika viwanja vya Taasisi ya (WAMA).

 Tabu Likoko Mkurugenzi wa Idara ya Uwezeshaji Wanawake katika Taasisi ya (WAMA) kulia na Philomena Marijani Afisa Uraghibishi na Mawasiliano Taasisi ya (WAMA) ambao ndiyo wenyeji wa wanasemina wakiwa katika semina hiyo.

ZIARA YA NAPE BUKOBA MKOANI KAGERA

Katibu wa Halmashauri Kuu ya CCM (NEC) CCM, Itikadi na Uenezi, Nape Nnauye akimsalimia Mwenyekiti wa Chama Cha Walemavu wilaya ya Misenyi mkoani Kagera, Simon Andrea, baada ya kufungua Baraza la Vijana wa CCM wilaya hiyo, jana, May 25, kwenye Uwanja wa Mashujaa, wilayani humo. Waliosimama ni baadhi ya viongozi wa CCM na UVCCM walioshiriki ufunguzi huo.

Nape akiwa ka Katibu wa CCM mkoa wa Kagera Avelyne Mushi baada ya kuwasili Uwanja wa Ndege wa Bukoba, kuanza ziara a kikazi ya siku moja mkoani Kagera.

Nape akizungumza na viongozi katika Ofisi ya CCM mkoa wa Kagera.

Nape akitoa salam za Mwenyekiti wa CCM, Rais Jakaya Kikwete kwenye msiba wa mtumishi wa siku nyingi waserikali,  Balozi, Dk. Vedasto Kyaruzi, mjini Bukoba, baada ya kwenda kwenye msiba huo wakati wa kuaga mwili wa marehemu tayari kwa mazishi yaliyofanyika jana mjini Bukoba.

Nape akikata utepe kuingia kwenye kambi ya Baraza la Umoja wa Vijana wa CCM, wilaya ya Missenyi mkoani Kagera, kwa ajili ya kufungua baraza hilo la mwaka.

Vijana wa CCM waliopiga kambi hiyo ya Baraza la Vijana, Missenyi, wakimsikiliza Nape alipowahutubia.

Nape  akimkabidhi cheti Kamanda wa Vijana wa CCM mkoa wa Kagera, Dioniz Malinzi kwa kuwa mmoja wa waliowezesha kambi hiyo ya Baraza la Vijana kufanyika.

Baadhi ya viongozi kwenye kambi hiyo wakimpungia mkono Nape wakati akiondoka

Rais Kikwete apokea ujumbe maalum kutoka kwa Rais wa Angola

Mjumbe maalum wa Rais wa Angola Dr.Andre de Oliveira Sango akiwasilisha ujumbe maalum kwa Rais Dkt.Jakaya Mrisho Kikwete ikulu ndogo mjini Dodoma leo asubuhi(picha na Freddy Maro)

Mama Asha Bilal akizungumza na Watanzania wanaoishi Botswana

Mke wa  Makamu wa Rais Mama Asha Bilal, akiwa katika picha ya pamoja
na Watanzania wanaoishi nchini Botswana baada ya kuzungumza na
Watanzania hao jana jioni mjini Gaborone Botswana.

PICHA NA VPO.

Mke wa Makamu wa Rais Mama Asha Bilal akizungumza na Watanzania
wanaishi Nchini Botswana jana.

Makamu wa Rais wa Jamhuri ya Muungano wa Tanzania Dkt.Mohammed Gharib
Bilal, akizungumza na Makamu wa Rais wa For Conervation Policy kulia
na Waziri wa Fedha wa Kenya Mhe. Robinson Njeru baada ya kumalizika
kwa mkutano wa siku mbili kwa wakuu wa nchi za Afrika kuhusu maendeleo
endelevu kwa nchi za bara la Afrika uliomalizika mjini Gaborone
Botswana jana jioni.

MBALI NA SHUGHULI ZA CHAMA PIA NAPE AKACHEZA GOFU KWENYE VIWANJA VYA DIONIZ MALINZI

Katibu wa NEC, Itikadi na Uenezi, Nape Nnauye akiwasili na ujumbe wake kwenye Uwanja wa ndege wa Bukoba, kwa ajili ya ziara ya siku moja ya kikazi mkoani Kagera ambako pamoja na shughuli nyingine alifungua Baraza la Vijana wa CCM, Wilaya ya Missenyi mkoani humo.

Nape alipata fursa pia kucheza gofu kwenye viwanja vya mchezo huo vya Dioniz Malizni (kulia) nje kidogo ya mji wa Bukoba

RAIS KIKWETE KUFUNGUA MKUTANO WA AFDB AMBAO UTAGARIMU BILIONI 12

Mwenyekiti wa kamati ya maandalizi ya mkutano wa (AFDB) Bw. Ngosha Magonya  katikati akiongea na waandishi wa habari mapema leo jijini Arusha.

Baadhi ya wanakamati wa kamati ya maandalizi ya mkutano wa AFDBwakiwa katika viwanja vya AICC jijini Arusha leo.

NA GLADNESS MUSHI-ARUSHA

 Benki ya maendeleo ya Afrika (AFDB)inatarajia kutumia kiasi cha Shilingi bilioni 12 katika mkutano wake unaoanza Jumatatu jijini Arusha na kufunguliwa na Raisi Jakaya Kikwete  huku kiasi cha fedha hizo zikitumika kukarabati Kumbi mbalimbali za jengo la Kimaitaifa la ukumbi wa AICC kwa kuwa baadhi ya kumbi za jengo hilo zinaonekana kupitwa na wakati kutokana na utandawazi uliopo kwa sasa ndani ya nchi zilizoendelea

Akizungumza jijini hapa na waandishi wa habari mwenyekiti wa kamati ya kitaifa ya mkutano wa benki ya AFDB kwa mwaka 2012 Bw Ngosha  Magonya  ambapo alisema kuwa mkutano huo utakuwa na faida kubwa sana

Alifafanua kuwa kupitia mkutano huo ambao utaanza Jumatatu ijayo utakuwa na faida kubwa sana kwa jiji la Arusha kwa kuwa hata kiwango cha uchumi kitaaimarika sana kwa kuwa wageni mbalimbali kutoka katika maeneo ya nchi mbalimbali duniani watabadilishana hata uzoefu

“kwa kipindi hiki ambacho kuna mikutano ndani ya jiji la Arusha tunatarajia kuwepo na utoafuti wa khali ya juu sana hasa katika mchakato wa uchumi na kwa hali hii pia tunatarajia hata kufanya maendeleo mbalimbali  ikiwemo kufanya marekebisho kwa jengo la kimataifa la AICC”alisema bw Magonya

Katika hatua nyingine alifafanua kuwa mbali na kuweza kuimarisha uchumi wa mkoa wa Arusha pia wanatarajia kutumia fursa mbalimbali za kuhakikisha kuwa wanakutanisha wafanyabiashara mbalimbali huku malengo yakiwa ni kuendeleza uchumi kwa walengwa.

Pia alifafanua kuwa mbali na kuweza kuwasaidia wafanyabiashara hao katika michakato ya kukuza uchumi pia benki hiyo ina mikakati mbalimbali ya kuendeleza barabara ambazo zitaweza kutumika kama njia ya mawasiliano hapa Tanzania hali ambayo nayo itachangia kwa kiwango kikubwa sana hata kuimarisha uchumi wa nchi ya Tanzania

Aliongeza kuwa hapo awali benki hiyo ilikuwa imeshajenga barabara ya Arusha –Namanga kwa sasa ana mpango wa kujenga barabara ya Arusha – Holile ndani ya Mkoa wa Kilimanjaro hali ambayo itachangia sana maendeleo hasa ya mawasiliano

Alimalizia kwa kusema kuwa wafanyabiashara hasa wa mkoa wa Arusha wanatakiwa kuhakikisha kuwa wanatumia vema fursa za mkutano huo ili kuweza kuimarisha biashara zao za kila siku.