DAWATI LA JINSIA NA WATOTO LAJENGEWA UWEZO.

 

Pichani washiriki wa mafunzo ya namna ya kutambua makosa ya ukatili wa kijinsia na unyanyasaji wa watoto wakimsikiliza mgeni rasmi, Naibu Kamishna wa Polisi (DCP) Adolfina Chialo, wakati wa kufuata mafunzo ya kutambua makosa ya ukatili wa kijinsia na watoto, yaliyofanyika mkoani Morogoro, mafunzo hayo yaliwakutanisha washiriki kutoka katika kanda tatu za mikoa ya Dodoma, Pwani pamoja na wenyeji mkoa wa Morogoro.( Picha na Demetrius Njimbwi, Jeshi la Polisi )

…………………………………………………………………………

Na Demetrius Njimbwi, Jeshi la Polisi

Mkuu wa Dawati la Jinsia na Watoto Nchini, Naibu Kamishna wa Polisi (DCP) Adolfina Chialo, amewataka wananchi kote nchini, kutofumbia macho vitendo vya ukatili na unyanyasaji ambavyo vimekuwa vikitokea katika jamii yetu huku vikiathiri idadi kubwa ya wanawake na watoto.

Kauli hiyo ameitoa jana wakati akifunga semina ya mafunzo kwa askari Polisi ya namana ya kutambua viashiria vya makosa ya ukatili wa kijinsia na unyanyasaji wa watoto, mafunzo yaliyofanyika kwa muda wa siku tano katika mkoa wa Morogoro, huku yakiwakutanisha washiriki kutoka katika kanda tatu za mikoa ya Dodoma, Pwani pamoja na wenyeji wa mafunzo hayo mkoa wa Morogoro.

Hata hivyo, Kamishna Chialo, alisema kuwa, lengo la mafunzo haya kwa askari na maofisa wa Jeshi la Polisi, ni kuwajengea uwezo katika kutoa huduma bora katika kazi za dawati la jinsia na watoto, ikiwa pamoja na kufahamu mbinu mbalimbali za kutambua makosa ya ukatili wa kijinsia huku wakitambua kuwa suala la utoaji wa huduma bora kwa mteja si hiari bali ni lazima.

Naye kwa upande wake mwakilishi wa Kituo cha Sheria ( legal Sector) waliofadhili mafunzo hayo, Bi. Wanyenda, alisema  kuwa, Jeshi la Polisi linamchango mkubwa katika kuwahudumia waathirika wa ukatili wa kijinsia na hivyo kutokana na mafunzo haya yatawasaidia askari katika kupambana na matukio ya ukatili wa kijinsia ambayo kwa kiasi kikubwa yamekuwa yakitendeka katika jamii.

Bi. Wanyenda, aliongeza kuwa, ni vyema askari waliopatiwa mafunzo haya wakaitumia  fursa hii waliyoipata kuweza kutoa elimu kwa askari ambao hawakuweza kushiriki katika mafunzo haya kwa lengo la kuwajengea uwezo na namna ya kutambua viashiria vya makosa ya ukatili wa kijinsia na unyanyasaji.

Akisoma risala mbele ya mgeni rasmi kwa niaba ya washiriki wenzake, Mkaguzi msaidizi wa Polisi, Letea Mofuga, alisema kuwa, mafunzo waliyopatiwa yamewasaidia kutambua na kubaini viashiria pamoja na dalili za mtu aliyefanyiwa ukatili na hivyo kuahidi kufanya kazi kwa kuzingatia miongozo waliojifunza.