Katibu mkuu wa wizara ya afya na ustawi wa jamii atembelea kituo cha afya cha Msoga

Mbunge wa jimbo la Chalinze,Bagamoyo mkoani Pwani, Ridhiwani Kikwete wa kwanza kulia alipoitembelea kituo cha afya cha Msoga juzi ,ambacho kinakaribia kukamilika(Picha zote na Mwamvua Mwinyi)

Kituo cha afya cha Msoga,kata ya Msoga ,Chalinze ,Bagamoyo Mmkoani Pwani,kikionekana kikiwa katika hatua za mwisho kukamilika kwa ujenzi wake ulioanza mwaka jana,ambapo hadi kukamilika kwake kitagharimu zaidi ya sh.mil 500

………………………………………………………………………………

KATIBU mkuu wa wizara ya afya na ustawi wa jamii Donani Mmbando amesema serikali kupitia wizara ya afya imejipanga kuhakikisha kunakuwepo na upatikanaji wa dawa,vifaa na vifaa tiba kwa asilimia 100, ndani ya miaka mitatu ijayo.

Amesema endapo hakutakuwa na utekeleza wa suala hilo kwa kipindi alichokitaja watakuwa tayari kupimwa kwa hilo.

Mmbando ameyasema hayo jana,kijiji cha Msoga,Chalinze wilayani Bagamoyo mkoani Pwani wakati alipoambatana na ujumbe kutoka wizara hiyo kutembelea kituo cha afya cha Msoga kujionea maendeleo ya ujenzi wa kituo hicho unavyoendelea.

Ameeleza kuwa katika kutekeleza mpango wa  matokeo makubwa sasa (BRN) ambapo sekta ya afya na ustawi wa jamii inaingia rasmi eneo moja wapo la kipaombele ni upatikanaji wa dawa ,vifaa na vifaa tiba vya kutosha.

Aidha Mmbando amesema hatua iliyopo sasa ni kuzungumza na wadau wa maendeleo wanaotaka kuwekeza nchini kwa lengo la kujenga viwanda vya kuzalisha dawa kutokana na zaidi ya asilimia 80 ya dawa hapa nchini zinaagizwa kutoka nje ya nchi kwa  gharama kubwa.

Amesema kuwa endapo kutakiwa na kiwanda nchini kutawezesha nafasi ya  ajira kwa wananchi,upatikanaji wa dawa za kutosha ,gharama itakuwa nafuu ukilinganisha na gharama kubwa inayotoza nje ya nchi na dawa zitapatikana kwa haraka.

Mmbando  ameeleza kuwa  anamini katika kuandaa bajeti ya mwaka ujao wa fedha watahakikisha suala la changamoto lililojitokeza la dawa litazingatiwa lisijitokeze tena kwa wakati mwingine.

Hata hivyo amezitaka kamati maalum katika ngazi zote nchini zinazosimamia uendeshaji wa huduma za afya ikiwemo kamati za vituo,bodi za afya kuhakikisha zinasimamia na kupanga uhitaji wa dawa za kuendesha vituo ,kusimamia na kudhibiti dawa zinazopokelewa vituoni ili kuondokana na upotevu wa dawa unaotokea njiani zinapokuwa zinasafirishwa kwenda vituoni.

 Akizunguzmia suala la udhibiti wa wizi wa dawa  amesema kwasasa serikali kupitia bohari ya dawa waliamua kuweka  alama maalum kwenye vidonge na dawa zinazonunuliwa na serikali hivyo zikikutwa katika maduka binafsi wataulizwa walipozitoa.

 Mmbando ameeleza kuwa mkakati huo utaendana na kuwataja wale watakaobainika kuiba dawa ili waaibike (name and shame)ambapo watawatangaza kwenye vyombo vya habari na kuweka picha ya mhusika kwa lengo la kupunguza vitendo hivyo .

Kuhusiana na kituo hicho ametoa ushauri katika maeneo mbalimbali yanayohusiana na ujenzi kwani kituo lazima izingatie miongozo na michoro inayotolewa na wizara ya afya na ustawi wa jamii,na kuzingatia huduma zinazotolewa katika vituo hivyo walibaini maeneo madogo yanayotakiwa kuboreshwa.

Nae mbunge wa jimbo la Chalinze Ridhiwani Kikwete pamoja na viongozi na wasimamizi wa kituo hicho katika kata ya Msoga walipokea ushauri huo .

Ridhiwani amesema changamoto za kiafya katika kata hiyo na mahitaji ya kiafya bado ni makubwa  hivyo ukamilishwaji wa kituo cha afya Msoga  kitasaidia kupunguza changamoto hizo hivyo aliitaka serikali kushirikiana nao pale watakapohitaji msaada ili kukamilisha kituo hicho.

Ameeleza kuwa kutokana na ajali nyingi zinazotokea mara kwa mara katika barabara ya Chalinze-Segera kituo cha afya Msoga kitawezesha kupunguza mzigo wa vituo vya afya vya Lugoba,Chalinze na Lugoba ambavyo vimekuwa vikipokea majeruhi wengi wa ajali .

Kituo cha kisasa cha afya cha Msoga,kilianza ujenzi wake mwaka 2013 na kinatarajiwa kukamilika mwaka ujao na hadi kukamilika kwake kitagharimu kiasi cha sh mil.500.