Msama Promotions kula na yatima

Na Mwandishi Wetu

 

KAMATI ya Maandalizi ya Tamasha la Krismasi inatarajia kusherehekea Sikukuu ya Krismasi kwa kugawa vyakula na mahitaji mengine muhimu  kwa baadhi ya vituo vya kulelea yatima vya jijini Dar es Salaam.

Kwa mujibu wa Mjumbe wa Kamati ya Maandalizi ya tamasha hilo, Jimmy Rwehumbiza hafla hiyo ya makabidhiano hayo inatarajia kufanyika Desemba 20 kwenye ofisi za Kampuni ya Msama Promotions zilizoko Kinondoni Block 41.

Rwehumbiza alisema wamefikiria kukabidhi zawadi hizo ikiwa ni mchango wa kampuni hiyo ambayo imejikita kusaidia jamii zenye uhitaji maalum kama yatima, walemavu na wajane.

“Tumeonelea kabla ya tamasha kufikisha mchango wetu kwa jamii, kwani sisi kama wadau wengine tunahitajika kusaidia kupitia kidogo tunachopata,” alisema Rwehumbiza.

Katika hatua nyingine, Mkurugenzi wa Msama Promotions aliahidi kukisaidia shilingi milioni moja kituo cha kulelea yatima na shule ya awali ya TUVUCHIDO kilichopo Temeke kwa Maganga ikiwa ni msadaa wa vifaa mbalimbali vitakavyosaidia elimu kwa walengwa wa Wilayani humo.

Akizungumza katika mahafali ya kuwaaga baadhi ya wanafunzi wanaotarajia kuanza darasa la kwanza mwakani, hafla iliyofanyika kwenye ukumbi wa Mamlaka ya Reli ya Tanzania na Zambia (TAZARA), Meneja Utawala wa Kampuni ya Msama Promotions, Mussiba Essaba aliyemwakilisha Msama alisema kampuni yao ni mojawapo ya kampuni zinazoguswa na wenye uhitaji maalum kama Yatima, walemavu na wajane.

Essaba alisema hawaishii hapo, wataendelea kuwa karibu na kituo hicho katika matukio mbalimbali hasa katika kipindi cha sikukuu ya Krismasi.

Aidha hafla hiyo ilikuwa na lengo la harambee ya kukusanya shilingi milioni 3.5 ambazo zitasaidia kituo hicho kwa vifaa kama madaftari, kalamu, kompyuta, mashine ya fotokopi na vinginevyo.    

Naye kiongozi wa kanisa la Lighthouse Chapel International kupitia mwakilishi wake, Coletha Mzena liliahidi shilingi milioni moja ambako  alikabidhi hundi ya shilingi 300,000.