Solomon Mukubwa apania kufanya makubwa

MUIMBAJI wa nyimbo za injili na mchungaji kutoka nchi jirani ya Jamhuri ya Kidemokrasia ya Congo (DRC) na mwenye makazi yake nchini Kenya Solomon Mukubwa amepania kufanya shoo ya nguvu katika Tamasha la Krismasi.

Ameeleza kuwa katika suala la kumsifu Mungu daima huwa hafanyi utani hivyo siku hiyo atahakikisha kila mmoja atakayefika kuondoka na baraka zake.

Solomon anasema kuwa kipaji chake cha uimbaji amepewa na Mungu ingawa ameweza kuongeza jitihada ili kuweza kufanikisha kipawa hicho.

Anaeleza kuwa pamoja na kuonekana kuwa muimbaji mkubwa lakini nyimbo zake zimetokana na waimbaji wa injili waliopo Tanzania kwani wana nafasi ya kwanza katika soko la muziki huo Jamhuri ya Kidemokrasia ya Congo (DRC) na Afrika kwa ujumla.

Solomon mwenye asili ya DRC anayetokea Goma Mashariki mwa mji huo ambapo aliweza kulelewa katika familia iliyokuwa ikifuata mafundisho ya Mungu ingawa baba yake alikuwa na wake wawili. 

Anasema kuwa aliondoka nchini Congo na kuachana na wazazi wake mwaka 2003 ambapo alielekea nchini Uganda na kukaa kwa miaka mitatu na nusu ndipo alipokutana na marehemu Angela Chibalonza aliyemuwezesha na kumpokea Nairobi nchini Kenya. 

Mwimbaji huyo mwenye ndoto nyingi ikiwemo ya kutaka kufungua kituo cha watoto yatima nchini Tanzania anasema kuwa anaipenda nchi hii kiasi cha kuwa tayari kutoa msaada kwa wahitaji mara kwa mara. 

“Watanzania hawana mioyo ya kinafiki ni wakarimu, wacheshi na wenye upendo ndio sababu mimi napenda kuwa Tanzania na kutoa misada ikiwemo kuweka kituo cha kulea watoto yatima” anasema Solomon. 

Solomon Mukubwa anaelezea alipopata ulemavu wa mkono anasema   akiwa na miaka 12, alipata matatizo ya uvimbe wa ajabu katika mkono wake wa kushoto. 

“Uvimbe huo ulikuwa wa ajabu sana na hakuna aliyefahamu chanzo kilikuwa ni nini? Niliugua kwa muda wa miaka mitatu”. 

Muimbaji huyo anasema wazazi wake walihangaika kumpeleka kwa wataalam wa hospitali mbalimbali na hata kwa waganga wa kienyeji bila mafanikio na anasema kuwa baada ya muda huo kupita ilianzishwa hospitali moja na Wazungu karibu na nyumbani kwao, na ndipo wataalam wa hapo waliposhindwa na kushauri akatwe mkono kwa lengo la kunusuru uhai wake. 

“Mkono wangu ulivimba sana na baadae ukaoza hiyo ndio sababu ya kukatwa mkono wangu, unajua shetani ni mjinga sana alinitesa kwa miaka mitatu ndiyo sababu ya kuimba wimbo wa Mungu mwenye nguvu,” anasema.