MAMA KIKWETE AWATAKA WAKAZI WA WILAYA YA LINDI MJINI KUHAKIKISHA WATOTO WAO WANAKWENDA SHULE

Mjumbe wa Halmashauri Kuu ya Chama Cha Mapinduzi (CCM) na Mke wa Rais Mama Salma Kikwete akizungumza katika kikao cha ndani na wajumbe wa Tawi la Nanyanje lililopo katika Kata ya Chikonji katika wilaya ya Lindi Mjini tarehe 12.12.2014. Mjumbe wa NEC Taifa ya CCM na Mke wa Rais Mama Salma Kikwete akiwapungia wananchi wa Kata ya Chikonji wakati alipofika kwenye Makao Makuu ya Kata hiyo kwa ajili ya mkutano wa kampeni kwa ajili ya uchaguzi wa serikali za mitaa unaotarajiwa kufanyika nchini tarehe 14.12.2014. Mamia ya wananchi waliofurika katika mkutano wa kampeni ulifanyika katika Kata ya Chikonji iliyoko katika Wilaya ya Lindi Mjini na kuhutubiwa na Mjumbe wa Halmashauri Kuu ya CCM Taifa Mama Salma Kikwete tarehe 12.12.2014.

Mjumbe wa Halmashauri Kuu ya Taifa ya CCM na Mke wa Rais Mama Salma Kikwete akijiandaa kupokea kadi kutoka kwa Ndugu Abdallah Mohammed Kilimbalimba aliyekuwa mwanachama wa Chama Cha Wananchi (CUF) ambaye aliamua kujiunga na Chama Cha Mapinduzi wakati wa mkutano wa kampeni huko Chikonji katika Wilaya ya Lindi Mjini tarehe 12.12.2014. Mjumbe wa Halmashauri Kuu ya CCM Taifa anayewakilisha Wilaya ya Lindi Mjini na Mke wa Rais Mama Salma Kikwete akiwahutubia mamia ya wananchi wa Kata ya Chikonji kwenye mkutano wa kampeni ya uchaguzi wa serikali za mitaa unaotarajiwa kufanyika nchini tarehe 14.12.2014. Mke wa Rais Mama Salma Kikwete akimchukua mtoto Subira kutoka kwa mama yake ambaye jina lake halikuweza kupatikana mara moja wakati wa mkutano wa kampeni huko Chikonji taqrehe 12.12.2014.

Mjumbe wa Halmashauri Kuu ya CCM Taifa na Mke wa Rais Mama Salma Kikwete akiwasili kwenye Tawi la                 Makonde lililoko kwenye Kata ya Mingoyo katika Wilaya ya Lindi Mjini huku akipokewa kwa shangwe na vifijo kwa ajili ya mkutano wa kampeni tawini hapo tarehe 12.12.2014. Baadhi ya akina mama wakishangilia kwa hisia kubwa wakati Mama Salma Kikwete alipokuwa akihutubia mkutano wa kampeni katika Kata ya Mingoyo uliofanyika katika Tawi la Makonde tarehe 12.12.2014. Mke wa Rais na Mjumbe wa Halmashauri Kuu ya Taifa ya CCM Taifa Mama Salma Kikwete akihutubia mkutano wa kampeni katika Tawi la Makonde lililoko katika kata ya Mingoyo tarehe 12.12.2014.

 PICHA NA JOHN LUKUWI

……………………………………………………………………………………..

Na Anna Nkinda – Maelezo, Lindi

13/12/2014 Wakazi wa wilaya ya Lindi mjini wametakiwa kuhakikisha watoto wao wanakwenda shule na kusoma kwa bidii kwani Serikali ya Chama cha Mapinduzi (CCM) imejenga shule za kutosha  katika kata zote za wilaya hiyo.

Mwito huo umetolewa jana na Mjumbe wa Halmashauri Kuu ya Taifa (NEC) ya CCM kupitia wilaya ya Lindi mjini Mama Salma Kikwete wakati akiongea kwa nyakati tofauti na wananchi waliohudhuria mkutano wa kampeni ya uchaguzi wa Wenyeviti na Wajumbe wa Serikali za mitaa uliofanyika katika Kata za Chikonji na Mingoyo.

Mama Kikwete ambaye ni Mke wa Rais Dkt. Jakaya Mrisho Kikwete alisema wakati ujenzi wa shule hizo unaanza vyama vya upinzani walizidharau na waliziita za yeboyebu kwa lengo la kuwakatisha tamaa lakini Serikali ya CCM kwa kushirikiana na wananchi hawakukata tamaa na kuendelea na ujenzi.

“Zamani wanafunzi waliokuwa wanajiunga na elimu ya Sekondari walikuwa wachache baada ya kukamilika kwa ujenzi wa shule hizi hivi sasa kila mwanafunzi anayefaulu mtihani wa darasa la saba anajiunga na elimu ya Sekondari haya ndiyo maendeleo yaliyoletwa na CCM”.

Ili uweze kuendelea ni lazima ukutane na changamoto nasi katika shule hizi tulikutana na changamoto za walimu na maabara, vyuo mbalimbali nchini viliweza kutoa walimu wengi  na kupunguza tatizo la walimu wa masomo ya sanaa na miaka michache ijayo watapatikana walimu wa kutosha wa masomo ya sayansi”, alisema Mama Kikwete.

Aliendelea kusema wakati wa ujenzi wa shule za Sekondari za Kata kulisahaulika ujenzi wa maabara kwa ajili  ya masomo ya sayansi, hivi sasa Serikali kwa kushirikiana na wananchi wanamalizia kazi ya ujenzi wa  maabara katika shule hizo  na hivyo kuwafanya  watoto kusoma masomo ya sayansi kwa fasaha zaidi.

MNEC huyo pia aliwataka wananchi hao kuchagua viongozi wanaofaa kwani uchaguzi ni kwa ajili ya kutengeneza maisha yao kwa  kipindi cha miaka mitano hivyo basi wasiweke rehani maisha yao kwa kufuata mkumbo na kuchagua viongozi wasiofaa.

Kwa upande wake Katibu wa CCM mkoa wa Lindi Adelina Gefi alisema katika uchaguzi wa Serikali za mitaa, vijiji na vitongoji chama hicho kitapata ushindi wa kishindo kwani hadi hivi sasa ndani ya  mkoa huo wagombea katika vitongoji 600, vijiji 80 na mitaa saba wamepita  bila kupingwa.

Gefi alisema CCM inaleta maendeleo na upinzani unachelewesha hivyo basi siku ya uchaguzi ikifika wananchi wajitokeze kwa wingi na kuwachagua wagombea wa chama hicho ili  wawaletee maendeleo.

Katika mkutano wa hadhara uliofanyika kata ya  Chikonji mwanachama mmoja aliyejulikana kwa jina la Abdallah Mohammed Kilimbalimba kutoka Chama cha Wananchi (CUF) alijiunga na Chama Cha Mapinduzi.

Mama Kikwete yupo wilayani humo kwa ajili ya kushiriki  kwenye kampeni na kuwanadi wagombea wa chama hicho wanaowania nafasi mbalimbali za uongozi katika uchaguzi wa viongozi wa Serikali za Mitaa, Vijiji na Vitongoji  unaotarajiwa kufanyika kesho nchini.